Barakaldon, musika-azoka bat eta hamar kontzertu asteburu honetan, 091 eta Def Con Dos taldeak izango dira izen handiak

Barakaldo musikazaleen topaleku izango da asteburu honetan. Herriko plazan bi karpa egongo dira. Horietako batean Bunker musika-azoka izango da gaur arratsaldetik igandera bitartean. 10 stand izango ditu eta bertaratzen diren jarraitzaileek honakoak aurkituko dituzte: disko-dendak, diskoetxeak, erreferentzia musikal ugari dituzten liburu-denda eta argitaletxeak, zinemari, telesailei edo komikiei buruzko bildumagileen artikuluak eta euskal ilustratzaileen lanak.

Bunkerrek mahai-inguruak eta solasaldiak ere hartuko ditu, non artistek, kritikariek, editoreek eta kazetariek musikarekin duten lotura emozionalari buruz hitz egingo duten. Artearen bidezko introspekzio-tailer bat ere emango da, eta, ondoren, bisita gidatu bat egingo da barrutitik, Bituritxako (Barakaldoko Oinarrizko Lanbide Heziketako Udal Institutua) ikasleentzat. Eta azokara hurbiltzen direnek Vittersweet & The Malamute, Gaizka Insunza eta M & A Swing Machine talde eta bakarlarien kontzertuez ere gozatu ahal izango dute.

Bunkerren baitan, Barakaldoko Long Play disko-dendaren 45 urteko ibilbideari aitortza herrikoia eta instituzionala egingo zaio. Azalera handiko supermerkatuek, lehenengo, eta online salmentak, ondoren, negozio txikiei eragin dizkien krisialdiei Euskadin eutsi dioten denda bakanetakoa da. Amaia del Campo alkateak platinozko disko bat emango die euren ibilbide luzea aitortzeko.

Azoka Hiriko Soinuaken festibalaren inguruan antolatu da. Musikaldia Herriko plazako beste karpan kokatuko da, eta ostiral eta larunbat arratsaldetan eta gauetan izango da. Ostiraleko izen handia Def Con Dos izango da, Los Deltonos, Lorreine eta PainApple taldeek lagunduta egongo dira, azken biak, Barakaldoko talderik onena eta euskarazko talderik onena, hurrenez hurren, Hiriko Soinuak lehiaketaren bosgarren edizioan. Larunbateko kartel burua Granadako 091 taldea izango da. Aurretik, Eva Martín eta Deñe izango dira, Hiriko Soinuak 2023 lehiaketako Berdintasun Sariaren eta Sari Nagusiaren irabazleak, hurrenez hurren. Bunkerrerako eta Hiriko Soinuaken festibalerako sarbidea doakoa izango da.

"Hiriko Soinuak proiektua 2019an hasi zen, Barakaldoko herritarrek aurrekontu parte-hartzaileen prozesuan egindako eskaera askori erantzunez. Bost urte hauetan pandemia bati biziraun dio, %40 baino gehiago handitu da talde berriei zuzendutako lehiaketako parte hartzea, eta doako festibala jardunaldi batetik bira igaro da, 2022an 4.500 pertsona baino gehiago bilduz.

Baina proiektuari hirugarren adar bat gehitzea falta zen. Bunker lau egunez Barakaldora Estatu osoko artista, argitaletxe, diskoetxe eta disko-dendak ekarriko dituen programa bat borobiltzera dator. Hauek guztiek lotura komun bat daukate: musikarekiko duten pasioa eta nola horrek egiten duten guztian eragiten dien.

Musikazaleekin partekatzen duten pasio hori, lau egun hauetan gure herriaren bihotzean bildu nahi dugu. Bunker musikaz eta emozioez hitz egiteko, entzuteko eta gozatzeko gunea izango da. Hori guztia, Barakaldon hain errotuta dagoen sentimendu komunitario horretatik abiatuta eraikitzen saiatuz, ondare historiko musikal hain baliotsua duen gure herrian. Hiriko Soinuak, gainera, gure ostalaritzarako eta merkataritzarako pizgarri izango da ere bai. Espero dugu barakaldarrek eta bisitatzen gaituzten pertsona guztiek ahalik eta gehien gozatzea asteburu honetan", adierazi du Amaia del Campo Barakaldoko alkateak prentsaurrekoan, Jon Gondra Hiriko Soinuak eta Bunkerren antolakuntzako kidearekin eta Eva Martín kantautorearekin batera egindako agerraldian.

Informazio gehiago eta ordutegiak:

HIRIKO SOINUAK 2023 FESTIBALA
Barakaldo, Herriko plazako karpa
Doako sarrera

Ostirala, urriak 20
19.00 Ateak irekitzea
19.20 PainApple
19.55 Lorreine
20.45 Los Deltonos
22.30 Def Con Dos

Larunbata, urriak 21
20.20 Ateak irekitzea
20.40 Eva Martin
21.20 Deñe
22.30 091

BUNKER
Urria. Osteguna 19, ostirala 20, larunbata 21 eta igandea 22
Herriko plaza, Barakaldo
Doako sarbidea
Karpa estalia (kontzertuetan, mahainguruetan, solasaldietan… 100 eserleku + zutik egoteko tokia)

Stand-ak:

Disko-dendak eta diskoetxeak:
-Long Play (Barakaldo): Disko denda 1978tik.
-Discos Bora-Bora (Granada): 2012an sortutako izen handiko disko denda.
-Alone Records (Malaga): 2000. urtean sortutako metal eta rock diskoetxea.
-Vinylora (Vitoria-Gasteiz): Disko denda 2019tik, artista berriei eta bezeroei arreta berezia eskaintzen diena.

Argitaletxeak:
-Lenoir (Girona): 60 erreferentzia baino gehiago dituen liburu denda eta argitaletxea. 2005etik pop, rock, jazz eta blues lanetan berezitutakoa.
-Editorial Milenio (Lleida): 750 lan argitaratu ditu 1996tik, 120 baino gehiago musikari buruzkoak.
-Txalaparta (Iruñea): Liburu denda eta argitaletxea 1987tik, Euskal Herriko argitaletxeen artean erreferentzia.

Memorabilia eta merchandisinga:
-El enano friki (L’Hospitalet de Llobregat): Zinemari, telesailei, komikiei, Mangari... buruzko bildumagile eta merchandising artikuluak.

Ilustratzaileak:
-Euskal Irudigileak: Euskadiko ilustratzaileen elkarte profesionala, 2003tik lanean eta 170 bazkide baino gehiagorekin. Euren bazkideen lanen erakusketa eta Cristina Fernández, Daniel Gojenola eta Iraia Okinaren lanen salmenta.

(ITURRIA: Barakaldoko Udala)

Twitter

Facebook