Barakaldon Adierazpen Instituzional bat onartu da Ukrainaren aurkako inbasio errusiarraren harira

Udalak Informazio Batzordea deitu du gaur, Errusia Ukrainan egiten ari den inbasio militarrari buruzko Adierazpen Instituzionala onartzeko.

Hau da talde politiko guztiek onartutako testua:

"Atzo, Errusiar Federazioak Ukraina estatu subirano baten inbasio militarra hasi zuen. Gerra honek nazioarteko legezkotasunaren aurka egiten du, eta gure erkidegoa osatzen duten balioen urraketa nabarmena da, baita Ukrainaren subiranotasunaren eta lurralde-osotasunaren aurkako eraso zuzena ere.

Hala ere, inbasio horren biktima nagusia ukrainar zibilak dira, beren etxeetatik kanpora joan behar izan baitute heriotza gordinaren mehatxupean, eta orain haien etxeak eta familiak, estatua, erakunde demokratikoak eta giza eskubideak suntsitzen ari dira.

Gerrak aurrera egiten duen bitartean, zaurituen, hildakoen eta desagertuen kopuruak gora egiten jarraitzen du. Dozenaka emakume, haur eta gizon hiltzen edo zauritzen ari dira bonbardaketetan eta beste eraso armatu batzuetan.

Bestalde, nabarmentzekoa da gure udalerriaren eta Ukrainaren artean dagoen harreman estua; izan ere, aspaldidanik Barakaldoko familiek herrialde horretako haurrak hartzen dituzte, batez ere Txernobylgo zentral nuklear zaharraren ingurukoak, bertan osasun-arazo larriak baitituzte. Ekimen horrekin elkarlanean ari da Udala, hainbat elkarterentzako diru-laguntzen bidez.

Ondorioz, eta aurreko guztiagatik, Barakaldoko Udalak adierazpen instituzional hau egin du:

Erabat gaitzesten dugu Errusiak nazioarteko zuzenbidea urratu izana Ukrainaren subiranotasun nazionala eta lurralde-osotasuna;
Uko egiten diegu gobernu errusiarrak Ukrainari laguntzeko ekintzak egiten dituztenentzat adierazitako errepresalia-mehatxuei;
Espainiako Gobernuari eskatzen diogu, Europako aliatuekin koordinatuta, beharrezko ekintzei ekin diezaiola bakea eta ongizatea berrezartzen direla bermatzeko.
Ukrainarako laguntza humanitarioa bidaltzeko eskatzen diogu Europar Batasunari eta nazioarteko komunitateari;
Dei egiten diegu eragile guztiei gerratik urrunduko gaituzten konponbideak bila ditzaten eta gatazka konpontzeko negoziazioaren oinarrira itzul daitezen;
Elkartasuna eta babesa helarazi nahi diegu ukrainarrei, eta, bereziki, gure lurraldean bizi direnei;
Balio demokratikoekin, bakearekin, nazioarteko legezkotasunarekiko errespetuarekin, giza eskubideekin eta Ukrainako herriarekiko elkartasun eta lankidetza humanitarioarekin dugun konpromisoa berresten dugu;
Errefuxiatuen harreran laguntzeko konpromisoa hartzen dugu, eskura ditugun baliabide guztiak erabiliz, udan Barakaldon egon ohi diren haurrak barne, eta gure babesa adierazten diegu adingabe horien ongizatearen alde lan egiten duten elkarteei;
Adierazpen instituzional hori Udalak erabilgarri dituen bide guztiak erabiliz zabalduko da."

Bestalde, Barakaldoko herritarrak datorren astelehenean, otsailaren 28an, 12: 00etan Bizikidetza Plazan kontzentratzera deitzea erabaki da.

(ITURRIA: Barakaldoko Udala)

Twitter

Facebook